အမေ…….


အမေ…….
ကိုဇော်ငြိမ်း


အဟောင်း  အဟောင်းတွေကို
သောင်းပြောင်းထွေစွာ မောင်းထောင်းနေရ
အကြောင်း အကြောင်းတွေ ပြန်စဉ်းစား
တစ်ခုမှ မကောင်းသေးတော့မရေရာ
သေချာတာတစ်ခုက  ဘာတစ်ခုမှဖြစ်မလာသေး
စဉ်းစားလိုက်တိုင်း  အသက်ရှူကျပ်
အသက်ရှူတိုင်းလည်း  စဉ်းစားနေမိတဲ့အဖြစ်
ဒို့ရဲ့ ဘဝပြည်သစ်…
ဒဏ်ရာတွေရှိလည်း  ချစ်နေမှာပါလေ……..။

မောတယ် အမေရယ်
သားကောင်တွေပေါတဲ့  တောအလည်ဝယ်
အမေက မုဆိုးဖြစ်လိုက်
သားကောင် ဖြစ်လိုက်နဲ့
မုဆိုးခြေထောက်  ဆူးမကြောက်ပေမယ့်
အမေ့ခြေထောက်  ဆူးပေါက်မှာတော့
သားတို့စိုးရိမ်မိတာ  အပြစ်တစ်ခု မဟုတ်ပါခင်ဗျာ……..။

အဖေမရှိတဲ့  ကျတော်တို့ဘဝ
အမေ့ကို  အားကိုးမိတာတော့ အမှန်ပါပဲခင်ဗျ
အမေသွန်သင်ခဲ့တဲ့  သြဝါဒစကား
အခုထိ  ပြန်ကြားနေပါတယ်လေ
အိမ်ထောင်စု တစ်ခုမှာ
စီးပွားရေးပြေလည်ရင်  သားသမီးတွေမှာ
ကျောင်းကပြန်လာ  လွယ်အိတ်ချ
ကစားကွင်းကို  ချီတက်ကြ
စီးပွားရေးက   မပြေလည်တော့
လွယ်အိတ်ကိုချ  ဈေးဗန်းကိုင်ရမှာ  အသေချာပါ
အမေမှာတာတွေ   မမေ့ခဲ့ပါဘူးခင်ဗျာ…….။

လူဆိုတာမွေးလာကတည်းက
အခွင့်အရေးဆိုတာ  ပါလာခဲ့တယ်
အမေပြောခဲ့တဲ့စကား 
ပဲ့တင်သံလိုမြည်ဟီးသွားတဲ့အခါဝယ်
ရ…. ရဘူးလိုက်ချင်တယ်  အမေရယ်……
နေရောင်အောက်က  အသက်ရှူသံများ ကြားနေတယ်
အမှောင်အတွင်းက  မျှော်လင့်ချက်တွေ မှားနေတယ်
အုတ်နံရံအတွင်းမှာ  တောက်ခေါက်သံတွေ များနေတယ်
စပါးပင်ရှိရက်နဲ့  ထမင်းမစားရသေးတဲ့  မျက်နှာတွေ သနားပါတယ်လို့
ပေတရာလမ်းက  မျက်ရည်တွေနဲ့ သွေးစတွေက
ပြောနေကြပါတယ်   အမေ……။

အမေ့တကိုယ်လုံးက  ဒဏ်ရာတွေကို
သားတို့ကို  မပြခဲ့ပေမယ့်
သားတို့  သိခဲ့ရပါတယ်လေ…
သားတို့နဲ့အတူ   စင်္ကြာဝဠာ ရေမြေအဆုံး
အမေ့အပြုံးကို  မြင်ဘူးကြပေမယ့်
အနောက်ဘက်မျက်နှာ  ကျားကွက်အလှည့်
အလို…သုမနကျောမှာ ဒဏ်ရာတွေနဲ့လို့
မကြည့်ရက်ခဲ့ပါဘူး   အမေ…….။

နေကောင်းလား မေမေလို့   မမေးပေမယ့်
အမေကျန်းမာပါစေ
ဧရာဝတီကို  ကယ်တင်နိုင်သလို
ပြည်မြန်မာ တခွင်ကိုလည်း ကယ်တင်နိုင်ပါစေ
တိုင်းရင်းသား အချင်းချင်း စစ်ခင်း
ချစ်ခြင်းများကိုလည်း  ဖန်ဆင်းပေးနိုင်ပါစေ
တကယ်သတ်မှာ ကြောက်လို့
နယ်စပ်မှာရောက်နေတဲ့  ဒုက္ခသည်အပေါင်းကိုလည်း
ကယ်တင်နိုင်ပါစေ…. အမေရေ…….။

တုနှိုင်းမရတဲ့ အမေ
ထာဝရ ရှင်သန်နေပါစေ
အမေကယ်မှ ဖြစ်မယ့်  မိသားစုဘဝ
သားတို့ကလည်း  အသိစိတ်တွေ
ရှင်သန်နိုးထနေမှာပါ   အမေ
အမေကျန်းမာပါစေ
အမေရွှင်လန်းပါစေ
လက်ဆယ်ဖြာမိုး  ဦးထိပ်စိုးလို့
အမေ့ကို  ကန်တော့လိုက်ပါသည်
အမေ့မေတ္တာမိုး
မြန်ပြည်တခွင်  အေးချမ်းပါစေ သတည်း………..။



1 comments:

RammarKyaw said...

ကျေးဇူးတင်ပါသည်..

Post a Comment